Триполи, 30 септември 2011 (МИА) - Вршителот на должноста премиер на Либија, вториот по ранг човек во Преодниот национален совет, Махмуд Џибрил, соопшти дека нема да биде во составот на новата либиска влада, пренесоа француските медиуми.
-Се надевам дека во скоро време ќе ги ослободиме Сирт и Бани Валид за да можеме да почнеме преговори за состав на преодната влада, во која јас нема да влезам, рече Џибрил.
Џибрил е либерал и се судрува со исламистичка опозиција во Преодниот национален совет.
Првично новата влада требаше да биде соопштена на 18 септември, но процесот беше забавен заради разликите меѓу членовите на ПНС и извршното биро на советот.
Во вторник ПНС одлучи да го одложи составувањето на владата за по преземањето на контролата врз целата земја.
Признат од ОН како законски претставник на либискиот народ, ПНС на почетокот на септември соопшти дека има намера да управува со земјата до изборот на Уставното собрание, најдоцна осум месеци пред изборите за парламент на Либија. Овој рок од осум месеца, меѓутоа, нема да почне да тече пред новите власти да ја преземат контролата врз целата земја.
Сега тие контролираат 90 проценти од либиската територија, појасни пратеникот на ОН за Либија Иан Мартин.