Брисел, 7 октомври 2011 (МИА) - НАТО синоќа соопшти дека планира постепено да ги повлекува силите од Авганистан и да ги пренесе обврските за безбедноста на авганистанските власти.
Американскиот секретар за одбрана Леон Панета истакна дека на министрите од земјите-членки на Алијансата им пренел дека САД планираат намалување на бројот на војниците во Авганистан, но оти нема да се повлечат медицинските екипи, хеликоптерите и другите важни ресурси.
Генералниот секретар на Северноатлантската алијанса, Андерс Фог Расмусен истакна оти авганистанските сили покажуваат се поголема подготвеност за преземање на одговорноста за безбедноста и оти целиот процес за пренос на контролата би требало да заврши до крајот на 2014 година.
Расмусен истакна оти на следниот Самит на НАТО во Чикаго ќе бидат донесени одлуките за понатамошните мерки.
- Да нема забуна, транзицијата не значи и заминување. Нема да ја напуштиме земјата кога Авганистанците ќе ја преземат одговорноста. Земјите-членки на НАТО се согласија за трајно партнерство со авганистанскиот народ, посочи Расмусен.