Вашингтон, 7 ноември 2011 (МИА) - Разузнавачките податоци, доставени до Меѓународната агенција за атомска енергија (МААЕ), покажуваат дека Иран веќе ги минал важните етапи, неопходни за создавање на нуклеарно оружје, пишува весникот „Вашингтон пост“.
Иран, се чини, ја добил решавачката техничка помош од странски експерти, пишува весникот, повикувајќи се на дипломати и нуклеарни експерти, запознаени со содржината на извештајот на МААЕ, што неделава треба да биде објавен.
Во извештајот, најдетален досега за ова прашање, се содржат нови подробности за улогата што ја одигра нуклеарниот научник од поранешниот Советски сојуз Вјачеслав Даниленко. Во него се тврди дека тој ги обучувал Иранците како се создава прецизен детонатор и како се употребува за предизвикување нуклеарна верижна реакција.
Истата техничка помош ја дале и експерти од Северна Кореја и Пакистан.
Извештајот на МААЕ потврдува дека биле основани сомневањата дека Иран и по 2003 година продолжил да се занимава со истражувања, поврзани со нуклеарното оружје, кога се сметаше дека ја запре својата тајна програма, сообразувајќи се со меѓународниот притисок.
Новите откритија покажуваат дека тајната иранска нуклеарна програма била поамбициозна, подобро организирана и поуспешна од тоа што се претпоставуваше, пишува „Вашингтон пост“.