Брисел, 14 ноември 2011 (МИА) - ЕУ денеска воведе нови санкции против Сирија, настојувајќи да изврши притисок врз режимот на претседателот Башар ал Асад, а од ОН побара да преземе акции за заштита на цивилите.
Санкциите се однесуваат на 18 Сиријци, главно воени претставници, на кои им забрането патување и издавање визи, додека нивниот имот ќе биде „замрзнат“ и оневозможена било каква трговија. Имињата на овие лица ќе бидат познати откако ќе се објават во службениот весник на ЕУ за еден или два дена.
Министрите за надворешни работи на земјите членки на ЕУ на состанокот во Брисел, исто така, одлучија да и оневозможат на Сирија натамошен пристап до фондовите на Европската инвестициска банка.
Со санкциите на ЕУ сега се опфатени вкупно 74 Сиријци и 19 организации, во обид да се натераат властите во Дамаск да ги прекинат крвавите пресметки со противниците на режимот на Асад.
Според проценките на ОН, од средината на март во антивладините протести во оваа земја се убиени речиси 3.500 луѓе.