Каиро, 21 ноември 2011 (МИА) - Европската унија го осуди вчерашното насилство во Египет, каде безбедносните сили убија најмалку 11 демонстранти на централниот плоштад „Тахрир“ во Каиро.
- Многу сум загрижена поради немирите и жестоките судири во Египет, посебно на плоштадот Тахрир овој викенд, истакна во своето соопштение високата претставничка на ЕУ за надворешна политика и безбедност Кетрин Ештон.
Таа изрази жалење поради жртвите и повика на мир и воздржаност, најостро осудувајќи го насилството.
Полицијата вчера, втор ден од насилствата во египетската престолнина, се обиде со палки и солзавец да ги растера илјадниците демонстранти кои бараат итен премин на власта на цивилните органи и повлекување на привременото воено раководство на земјата.
Според медицински извори, најмалку четири лица загинале од куршуми, а останатите се задушиле од солзавецот.
На новите овластувања за Воениот совет се спротивставуваат и исламистичките и либералните групи во Египет, иако меѓусебно се натпреваруваат, пред одржувањето на парламентарните избори во земјата на 28 ноември, откако во февруари беше соборен од власт долгогодишниот претседател Хосни Мубарак.