Лондон, 22 ноември 2011 (МИА) - Саиф ал Ислам, син на соборениот и ликвидиран либиски лидер Моамер Гадафи, му нудел милион евра на еден племенски водач, за да му помогне да пребега во соседен Нигер, тврди денеска весникот „Дејли телеграф“.
Според овој лондонски весник, Јусеф Салех ал-Хатмани кој во реонот на градот Зинтан на крајниот југ од Либија работел и како водич низ пустината, вели дека Ал Ислам му понудил пари за да него и уште четворица придружници, ги префрли преку границата, јави дописникот на МИА од Лондон.
Овој човек уште тврди дека синот на Гадафи зборувал како оттаму ќе ја продолжел борбата против нивната власт.
Ал Хатмани, меѓутоа, наместо кон границата, се упатил кон првата пустинска дина, каде чекале сокриени борци од една бунтовничка бригада. Патувајќи ноќе низ пустината, водичот ги довел Ал Ислам и придружниците, право до вооружената единица на бунтовниците, која без никаков отпор и без борба ги заробиле бегалците.
Синот на Гадафи е заробен во саботата по полноќ, од 14 борци на т.н. Зинтан бригада.
- Само Алах помогна да го совладаме и да го освоиме нашиот непријател, изјавил за „Дејли телеграф“ Хатмани, објаснувајќи дека „никакви милиони не може да купат ниту една капка од маченичката крв на Либијците“.
Саиф ал Ислам, дипломец на угледната Лондонска школа за економија (ЛСЕ) од порано предупредуваше дека „исламистите ќе ја преземат Либија“ под своја контрола.