Триполи, 25 ноемрви 2011 (МИА) - Синот на поранешниот либиски лидер Моамер Гадафи, Саиф ал Ислам, мора да биде опериран заради гангрена што му ја зафати дланката, на местата каде му се откинати палецот и показалецот, изјави денеска лекарот кој го прегледал.
Саиф (39) се здоби со повреда на прстите на десната рака во текот на НАТО бомбардирањата од пред неколку недели.
-Оваа рана не е најдобра и неопходна е ампутација, изјави Андреј Мураковски, докторот кој работи во Зинтан.
Мураковски, кој е роден во Украина, пред три дена го прегледа Саиф и тогаш изјави дека доколку тој не биде опериран може сериозно да се разболе.
-Неговиот показалец е откинат, коските се згмечени.....Исто е и со палецот, изјави Мураковски.
Хируршката интервенција, што е неопходна, е едноставна и може да се изведе и во Зинтан под локална анестезија, наведе Мураковски.
Борците од Зинтан, кои го држат Саиф во заробеништво, не сакаат да го префрлат во болница, стравувајќи дека некој може да го убие.
-Можев тоа да го направам пред три дена. Не е ургентно, состојбата е таква веќе цел месец. Но, ќе биде добро доколку набрзо биде опериран, истакна лекарот.