Каиро, 25 ноември 2011 (МИА) - Илјадници Египќани се собраа изутринава на плоштадот „Тахрир“ во Каиро на демонстрации насловени како „Последна шанса“ за соборување на воената власт.
Улиците до Министерството за внатрешни работи, во близина на плоштадот, кои изминатите денови беа арена на судири, остануваат блокирани.
Освен итното повлекување на армијата од власт, демонстрантите, кои го окупираат „Тахрир“ веќе осми ден, бараат и судска истрага за одговорните за смртта на 41 лице, од кои 36 во Каиро, кои загинаа за време на судирите меѓу безбедносните сили и демонстрантите.
„Петок на последната шанса...стабилност или хаос“, е наслов на првата страница на владиниот весник „Ал Ахрам“, три дена пред одржувањето на првите парламентарни избори во земјата, организирани по соборувањето на Хосни Мубарак на 11 февруари.
Врховниот воен совет ја отфрли вчера можноста за итно повлекување од власта и соопшти дека ќе ги продолжи консултациите за назначување на нов премиер на местото на Есам Шараф. Според приватните египетски телевизии армијата побарала формирање на нова влада на поранешниот премиер Камал Ганзури.