Техеран, 11 јануари 2012 (МИА) - Две лица, од кои едниот ирански универзитетски професор беа убиени денеска во бомбашки напад во Техеран.
Напаѓач со мотоцикл поставил магнетна бомба на возилото на 32-годишниот хемичар Мустафа Ахмади Рошан. Во нападот биле ранети две лица.
Според иранската агенција Фарс, Рошан бил заменик-директор на трговскиот оддел во институтот за збогатување ураниум во Натанз.
За време на експлозијата во автомобилот „пежо“ 405, освен професорот имало и уште две лица. Според Фарс, експлозијата била „терористички напад“ врз Рошан.
Очевидци, изјавија дека виделе две лица на мотоцикл, кои ја поставувале бомбата на возилото. Според нив, освен Рошан во експлозијата загинал и пешак.
Висок службеник во Техеран го обвини Израел за нападот, кој наликува на претходни напади врз ирански нуклеарни експерти.
- Бомбата е била магнетна, иста како оние кои беа користени врз претходни убиства на научници. Тоа е дело на ционистите, рече Сафар Али Братлу од градската управа на Техеран.