Сана, 21 февруари 2012 (МИА) - Во Јемен денеска ќе бидат одржани претседателски избори за кои се верува дека ќе означат почеток на демократизацијата на земјата, но и ќе стават крај на 33-годишното владеење на претседателот Али Абдула Салех.
Иако единствен кандидат на изборите ќе биде заменикот на Салех, Абд-Рабу Мансур Хади, сепак постои убеденост дека изборите ќе го отворат патот за неопходните политички и економски реформи, но и реформи во безбедносните сили кои моментално ги управуваат роднини на јеменскиот претседател.
Салех, кој од јануари минатата година правеше обиди за смирување на протестите на кои се бараше негово заминување, во ноември потпиша договор за постепено отстапување од своите овластувања што беше и резултат на меѓународниот притисок да се повлече.
Врз јеменскиот претседател во јуни минатата година беше извршен обид за атентат во кој Салех доби тешки изгореници поради кои минатата година замина на лекување во САД.
При заминувањето во САД тој се извини на својот народ за „сите недостатоци“ за време на неговото долгогодишно владеење и порача дека ќе се врати во земјата.
Јеменскиот претседател официјално ќе се повлече од власт во текот на оваа недела, но не се очекува никаква церемонија за време на настанот.
Се очекува и новиот јеменски претседател, како и Салех кој важи за сојузник на САД во борбата против Ал Каеда во Јемен, да продолжи со уништувањето на екстремистите кои веќе долго време извршуваат напади во земјата и се закануваат да ја вовлечат таа сиромашна земја во граѓанска војна.