Москва, 9 март 2012 (МИА) - Американскиот претседател Барак Обама телефонски му ја честита победата на претседателските избори на рускиот премиер Владимир Путин.
Телефонскиот разговор имал „неофицијален и содржаен карактер“ и траел околу 20 минути, истакна советникот на Путин за меѓународни прашања Јуриј Ушаков.
Американскиот претседател изразил надеж дека „започнатите во последните години позитивни тенденции во меѓусебните односи ќе бидат зајакнати“, потенцирајќи ја подготвеноста „тесно да соработуваат со избраниот руски претседател Владимир Путин“.
Путин од своја страна му се заблагодарил на Обама и го нагласил големото значење на соработката меѓу Русија и САД за гарантирање на безбедноста во светот, имајќи ја предвид сегашната турбулентна ситуација.
Меѓу другото, новоизбраниот руски претседател истакнал дека треба да се надминат разединувањата на позициите меѓу Москва и Вашингтон во преговорите за противракетната одбрана.