Бејрут, 3 април 2012 (МИА) - Најмалку 34 лица, меѓу кои 16 цивили, загинаа во Сирија, откако армијата ги засили операциите против неколку упоришта на протестите и се судри со дезертирани војници во близина на турската граница, соопштија сириски активисти за човекови права.
Раководителот на Сирискиот центар за правата на човекот Рами Абдел Рахман ја обвини армијата за користење на тактиката „опожарени куќи“.
Постојат информации за случаи на палење на куќи на бунтовници и дезертирани војници во Дераа, Хомс, провинциите Идлиб и Хама, изјави Рахман, истакнувајќи дека оваа тактика се користи секојдневно повеќе од три месеци.
- Војската врши кражби и грабежи. Тоа е еден вид колективна казна, што може да се приклучи кон извршените злосторства против човештвото, нагласи Рахман.
Вчера во Сирија се убиени и девет дезертирани војници и девет војници од провладините сили.
Претседателот на Меѓународниот комитет на Црвениот крст (МКЦК) Јакоб Келенберг синоќа пристигна во Дамаск на дводневна посета, во рамките на која ќе се сретне со неколку министри, со цел да разговара за хуманитарната помош и примирјето, соопшти организацијата.
Средбите на Келенберг започнуваат денес со разговори со сирискиот министер за надворешни работи Валид Муалем, министерот за внратрешни работи Мохамед Ибрахим аш Шаар и претседателот на сириската Црвена полумесечина Абдел Рахман Атар, изјави портпаролот на МКЦК во Дамаск, Салех Дабакех.
Келенберг се очекува утре да го посети градот Дераа, каде може да биде поделена и хуманитарна помош, истакна портпаролот.