Москва, 10 април 2012 (МИА) - Сирискиот министер за надворешни работи Валид Муалем денеска во Москва изјави дека сириските власти веќе почнаа со повлекување на одделни сили од сириските градови, согласно планот на пратеникот на ОН и Арапската лига Кофи Анан.
Муалем, по разговорот со рускиот колега Сергеј Лавров, истакна дека планот за прекин на огнот мора истовремено да биде следен со распоредување на припадници на меѓународната набљудувачка мисија.
-Веќе ги повлековме силите и воените единици од неколку сириски провинции, рече Муалем.
Лавров изјави дека официјален Дамаск може поактивно да го спроведува мировниот план на Анан за решавање на ситуацијата во земјата.
-Проценуваме дека сириските активности во спроведување на релевантните одредби од планот можат да бидат поактивни и поодлучни, рече Лавров.
Опозицијата во Сирија која вооружено му се спротивставува на претседателот Башар ал Асад тврди дека од планот на Анан ништо нема да биде, бидејќи владините сили не сакаат да го почитуваат договорот.
Турција соопшти дека не планира да презема никакви еднострани дејствија во однос на Сирија, соопшти Лавров.
Тој забележа дека ја слушнал изјавата од Анкара, според која „мировниот план на посредникот Анан јавно пропадна и турската страна ќе почека неколку дена, па сама ќе преземе одлуки“.
Во врска со тоа, Лавров телефонски разговарал со својот турски колега Ахмет Давутоглу.
-Давутоглу ме увери дека Турција не планира никакви еднострани дејствија, изјави Лавров.