Вашингтон, 20 јули 2012 (МИА) - Американскиот претседател Барак Обама оцени дека „безмилосниот“ самоубиствен напад врз автобусот со израелски туристи во Бугарија и насилствата во Сирија се доволна причина за зајакнување на поддршката на САД кон Израел.
За време на предизборниот собир на Флорида, Обама се осврна на нападот на аеродромот во Бургас, нарекувајќи го „варварски и безмилосен терористички напад“.
- Сакам сите тука да знаат дека за време на мојот мандат Владата не само што не ги наруши врските со Израел, туку и ги зајакна. Ова е момент на голема небезбедност на Блискиот Исток, ако се земат предвид случувањата во Сирија и на други места. Сега е време да гарантираме дека ќе направиме се што можеме за да ја заштитиме безбедноста на Израел, истакна Обама пред гласачите на Флорида, каде живеат голем број Евреи.
Израел го обвини Иран за нападот во Бугарија.