Дамаск, 7 август 2012 (МИА) - Хуманитарната ситуација во сирискиот град Алепо, каде продолжуваат борбите меѓу припадниците на армијата и на опозицијата, се влошува, изјави синоќа сенегалскиот генерал Бабакар Гаје, шеф на набљудувачката мисија на Обединетите нации во Сирија.
- Исклучително сум вознемирен од насилството во Сирија, најмногу се влошува ситуацијата во Алепо, истакна Бабакар.
Тој апелираше до завојуваните страни да го поштедат цивилното население и да го почитуваат меѓународното хуманитарно право.
- Цивилите не треба да бидат цел на бомбардирање, против нив не треба да биде користено тешко оружје, наведе генералот.
Хуманитарните организации предупредуваат дека изминативе денови во Алепо се зголемува потребата од вода за пиење, гориво и електрична енергија.
Според податоци на Меѓународниот комитет на Црвениот крст и Сириската арапска Црвена полумесечина поради борбите Алепо го напуштиле повеќе од 200.000 луѓе.
Дваесетина набљудувачите од Мисијата на ОН во Сирија, кои беа распоредени во Алепо, за време на викендот се повлекоа од градот поради борбите.
Портпаролот на ОН Жозефина Гереро наведе дека повлекувањето на набљудувачите е привремено.
Алепо беше една од четирите бази од каде дејствуваа набљудувачите на ОН покрај Деир аз Зур, Хомс и Дамаск.