Техеран, 21 септември 2012 (МИА) - Иранскиот претседател Махмуд Ахмадинеџад оцени денеска дека Западот има „двојни стандарди“ кога станува збор за антиисламскиот филм и објавувањето на карикатурите на пророкот Мухамед во францускиот неделник.
Тој го нарече филмот израелска завера за да се „поделат (муслиманите) и да се поттикне конфликт меѓу сектите“.
Ахмадинеџад рече дека наспроти „најгрдите навреди на Мухамед, тие (Западот) истакнуваат слоган за почитување на слободата на говорот“, што, како што кажа, е „јасна измама“.
Ахмадинеџад, на воената парада во Техеран, рече дека не верува во повтореното тврдење на американските претставници дека администрацијата на САД нема ништо со нискобуџетните филмови „Невиноста на муслиманите“.