Дамаск, 8 ноември 2012 (МИА) - Сирискиот претседател Башар ал Асад порача дека нема намера да ја напушти Сирија, по шпекулациите дека би можел да добие азил на Запад во замена за повлекување од власта, пренесува Б92.
Во интервју за ТВ „Раша тудеј“, Асад изјави дека „ќе живее и ќе умре само во својата земја“ и предупреди на „непроценливата цена доколку светот се одлучи за воена интервенција“.
Британскиот премиер Дејвид Камерон во вторникот изјави дека претседателот на Сирија може да добие сигурен излез од земјата и имунитет доколку ги прекине судирите во земјата.
-Секако, јас сум за тоа тој да се соочи со меѓународниот закон и правда заради тоа што го стори. Јас сигурно нема да му понудам да дојде во Велика Британија, но ако сака да си замине од Сирија, може да си замине, тоа ќе може да се среди, рече Камерон за саудиската ТВ „Ал Арабија“ со седиште во Абу Даби.
Асад изјави и дека се сомнева дека Запад ќе се одлучи за воена интервенција за да ги спречи судирите во Сирија.
-Мислам дека тие одат во тој правец, но ако тргнат, никој не може да каже што ќе се случи. Верувам дека цената за нападот може да биде многу поголема од тоа што светот може да ја поднесе. Нападот би имал домино ефект, додаде Асад.