Канадски свештеник осуден на 11 години затвор поради сексуални кривични дела

Отава, 14 март 2013 (МИА) - Пензиониран римокатолички свештеник во Канада е осуден на 11 години затвор поради сексуални кривични дела извршени врз момчиња.

Џорџ Ансел Смит призна дека е виновен пред покраинскиот Врховен суд во врска со 41 обвинение поврзани со сексуално малтретирање и злоставување.

Пред судот е потврдено дека кривичните дела биле извршени во периодот од 1969 до 1989 година во западниот дел на Њуфаундленд.

Обвинителството барало казна затвор меѓу девет и 13 години. Одбраната, пак, сметала дека е доволна казна од седум до девет години, како и намалување од една година која обвинетиот веќе ја поминал во притвор.

Судијата Вилијам Гудриџ денеска соопшти дека Смит ќе одлежи уште 10 години затвор, земјаќи го предвид времето кое го поминал во притвор.