Њујорк, 16 септември 2013 (МИА) - Генералниот секретар на ОН Бан Ки-мун го доби извештајот на инспекторите на светската организација за нападот со хемиско оружје во предградие на Дамаск на 21 август, објави неговиот портпарол Мартин Несирки.
Документот бил донесен во Њујорк од страна на шефот на тимот, шведскиот професор Оке Селстром.
Денеска Бан Ки-мун ќе го претстави извештајот на затворена седница на Советот за безбедност на ОН, а подоцна во текот на денот и пред Генералното собрание на светската организација.
Според дипломатски извори извештајот ќе потврди дека хемиски гас сарин бил употребен при нападот во предградие на Дамаск на 21 август, но нема да обвини за нападот ниту една од страните во конфликтот.