Вашингтон, 22 октомври 2013 (МИА) - Американската Агенција за национална безбедност (НСА) ги шпионирала сите латиноамерикански земји, изјави пред учесниците на 69. собрание на Меѓународното здружение на печатот, поранешниот новинар на весникот „Гардијан“. Глен Гринволд, кој ги објавува документите на поранешниот соработник на НСА, Едвард Сноуден.
Гринволд, кој живее во Бразил, телефонски се вклучи во работата на средбата на медиумското здружение, организирана во американскиот град Денвер.
Новинарот истакна дека повеќето документи, кои ги поседува Сноуден, се уште не се објавени, ветувајќи дека тие наскоро ќе се појават во весниците. Тој, исто така, додаде дека кај него постојат уште материјали за незаконското следење на Американци во САД.
Коментирајќи го скандалот со прислушувањето на француски граѓани од страна на НСА, Гринволд потврди дека весникот „Монд“ одамна располагал со оваа информација.
- Одлуката кога и во каква форма да биде објавена оваа информација е на самиот весник, нагласи Гринволд како одговор на прашањето дали се чекало совпаѓање со посетата на американскиот државен секретар Џон Кери на Париз.
Претходно, новинарот на Твитер напиша дека за брзо време ќе објави информација за американското шпионирање на Шпанија.