Женева, 24 јануари 2014 (МИА) - Лидерот на главната сириска опозициска група, Ахмад Џарба си заминал од Женева, тврдат дипломатски извори.
Претседателот на Националната коалиција на опозициските и револуционерни сили во Сирија му дал овластувања на генералниот секретар на оваа групација Бадр Џамус да ги води преговорите во име на опозицијата. Џамус добил и овластување да ги прекине преговорите во секој момент доколку е тоа потребно.
Претходно, сириската владина делегација се закани со повлекување од преговорите, доколку „до сабота не почнат сериозни разговори“. Заканата на сириската делегација доаѓа по изјавата на Џарба дека „Асад и неговиот режим се политички труп, па затоа тие не можат да бидат дел од иднината на Сирија“.
Бутина Шабан, советник на претседателот Башар ал Асад, за Би-Би-Си изјави дека „повеќе нема да има заеднички средби со делегацијата на опозицијата“. Според него, додека владината делегација инсистира на разговори за прекин на борбите, опозицијата „е заинтересирана само за смена на претседателот Асад од власт“.
За попладнево во 16 часот е закажана средба на делегацијата на сириската влада со специјалниот пратеник на ОН и Арапската лига за Сирија, Лахдар Брахими.
Опозицијата, пак, предупреди дека нема да има заедничка средба на двете страни, ако владината делегација не го прифати договорот од претходната конференција „Женева 1“ од пред 18 месеци, со кој се бара создавање на преодна влада.