Екипажот не предизвикал исчезнување на авионот

Куала Лумпур, 12 март 2014 (МИА) - Висок претставник на малезиската авиокомпанија „Малезијан Ерлајнс“, која е сопственик на исчезнатиот Боинг, изјави дека нема основа да се смета дека какви било дејствија на екипажот предизвикале исчезнување на авионот.

Комерцијалниот директор на малезиската компанија Хју Данливи, изјави дека нема основа да се верува дека нешто или какви било дејствија на екипажот се причина за исчезнувањето.

Потрагата по авионот продолжува денеска во поширок периметар во регионот од Кина до Андаманското Море.

Малезија побарала од Индија да и помогне да го локализира исчезнатиот авион, се наведува во соопштение на индиското Министерство за внатрешни работи. Засега се уште не е одлучено во кои региони на Индија ќе почне истрагата.

Ова е официјално петтиот ден од потрагата по авионот со 239 патници што летал од Куала Лумпур за Пекинг. Последниот контакт со контролорите на летот авионот го остварил кај источниот малезиски град Кота Бар.