Субианто не го признава пребројувањето на гласовите

Џакарта, 22 јули 2014 (МИА) – Кандидатот за нов претседател на Индонезија, Прабово Субианто, само неколку часа пред објавувањето на резултатите од претседателските избори, оддржани на 9 јули, објави дека се повлекува од изборниот процес.

Тоа, според Прабово, не значи откажување од претседателската функција, бидејки неговиот тим, кој ангажирал 2.000 адвокати има собрано докази за нерегуларности за кои тој ќе бара арбитража од Уставниот суд на Индонезија.

Прабово е кандидат на коалицијата предводена од Партијата за голема Индонезија „Гериндра’’. Од почетокот на пребројувањето на гласовите од над 130 милиони Индонезијци кои излегоа на изборите за нов претседател, Прабово има меѓу четири и шест отсто помалку гласови од второт кандидат Јоко Видодо.

Поради претпоставки за можни судири меѓу поддржувачите на двајцата кандидати по соопштувањетона резултатите, полицијата и армијата во Индонезија се на висок степен на готовност. Само во Џакарта, за одржување на редот и мирот, покрај редовните 30, ангажирани се уште 25.000 полицајци од резервниот состав, а во касарните е воведен таканаречен „жолт’’ аларм.