Вашингтон, 22 јули 2014 (МИА) - Јуни беше најтоплиот месец во светот од 1880 година, кога и почнале официјалните мерења на температурата, објави Американската агенција за океан и атмосфера.
Комбинираната просечна температура на површината на копното и океанот изнесувала 16,22 степени Целзиусови, што е за 0,72 степени поголема од просекот во 20-от век за тој месец.
На тој начин е надминат претходниот рекорд од јуни 2010 година.
Месечните температури во поголем дел на планетата се над просекот, со рекордно високи температури на југоистокот на Гренланд, на северот на Јужна Америка, на истокот и во централните делови на Африка, и на југот на Азија.