Куала Лумпур, 29 јули (МИА) – Повеќето жители на главниот град на Малезија, Куала Лумпур, денеска по улиците се движеа со маски за полесно дишење, бидејки поради густите облаци чад што доаѓаат од опожарените шуми на островот Борнео, воздухот е алармантно загаден. Надлежните служби денеска соопштија дека со густи облаци чад воздухот е загаден во девет подрачја на Малезија.
Најкритично било вчера во во градот Сибу, во провинцијата Саравак, која се наоѓа на малезискиот дел на Борнео. Тамо вчера на скалата за загаденост која има 250 степени, е регистрирано загадување на двестотиот степен. Денеска таму состојбата е малку подобрена, но сеуште за ова подрачје важи категоризацијата дека има „многу нездрав’’ воздух за дишење.
Според сателитски снимки на островот Борнео има 70 пожари кои ги горат прашумите во последнава недела. Слична е состојбата со пожари и во индонезиската провинција Ачех, на западна Суматра, но тамо поројните тропски дождови помогнале да се локализираат пожарите што се закануваа да го загадат воздухот во Сингапур и поширокиот регион.