Џакарта, 30 јули 2014 (МИА) - Над 420 пожари, од кои 268 се на западниот дел на островот Калимантан, а 143 во провинцијата Риау во близина на Малезија и Сингапур, се вон контрола, соопшти денеска Националната агенција против катастрофи на Индонезија.
Во гаснење на пожарите помагаат и припадници на армијата и воздухопловството. Густиот чад ја намалил видливоста на помалку од два километри, а ветровите, како што се претпоставува, до утре ќе го разнесат чадот и над Малезија.
Во Куала Лумпур и седум други малезиски провинции воздухот е веќе загаден од пожарите што избија во Индонезија минатата недела. Ако и натаму не заврне и ако ветерот не го смени правецот, малезиските власти ќе прогласат тревога.
Среќа во несреќа имаа жителите на Сингапур, каде што во последниве два дена врнат обилни монсунски дождови што предизвикуваа поплавување на поголем дел од градот. Поплавените улици брзо се санираат, а дождот придонесе Сингапурците, барем денеска и утре, да дишат чист воздух.