САД лобираат во Азија за поддршка на економските санкции спрема Русија

Сингапур, 30 јули 2014 (МИА) – САД лобираат кај азиски влади да се придружат на санкциите што Вашингтон и ЕУ ги наметнаа спрема Русија заради поддршката на Москва кон проруските активисти на исток во Украина.

– Се надеваме дека тие држави во тој регион, ќе се придружат во нов притисок врз Русија, изјави неименуван американски официјален претставник во Сингапур. Тој додава дека веќе бил во Пекинг и Сеул оваа недела каде на таа тема разговарал со високи државни лица и бизнис лидери. Најави и посета в петок во Токио.

– Причината за нашето ангажирање во тој регион од светот е потребата да развиеме координиран, мултинационален одговор на тој вид руска агресија, додаде официјалниот претставник од Стејт департментот.

Според него, соборувањето на малезискиот авион на 17 јули на исток во Украина му покажал на светот дека станува збор за „глобален проблем“.