Манила, 20 октомври 2014 ( МИА ) – Командата на филипинската армија денеска соопшти дека се уништени два логори на исламистичкото радикално движење Абу Сајаф, кое како огранок на Ал Каеда делува на југот на Филипините и во Малезија. Операцијата за уништување на бунтовничките логори завршила вчера попладне, но бунтовниците, со околу 100 луѓе под оружје и десет заложници, од кои 4 странци, избегале и се скриле во густата прашума.
Филипинската армија ја интензивираше потрегата по терористите од Абу Сајаф по нивните закани дека ќе ги обезглавуваат киднапираните странци ако за нив не добијат откуп. Абу Сајаф на социјалните мрежи и на локалното радио Минданао од пред две недели објавува закани дека на југот на филипинскиот архипелаг ќе прогласат исламски калифат, идентичен на оној во Ирак и Сирија.
Малезискиот миистер за одбрана минатата недела ги повика Филипините, Брунеј и Индонезија повеќе да соработуваат во откривањето на припадниците на Абу Сајаф. Оваа терористичка групација тврди дека за боиштата во Сирија и Ирак регрутирала 1.200 борци, а дека исто толку бунтовници под нивна команда се подготвуваат да го прогласат исламскиот калифат во југоисточна Азија.