Њујорк, 22 октомври 2014 (МИА) - Патниците од земјите на Западна Африка, погодени со вирусот на еболата, од денеска може да слетуваат во САД само на пет меѓународни аеродроми.
Оваа одлука се однесува на патниците од Сиера Леоне, Либерија и Гвинеја, кои од сега ќе пристигнуваат во САД само на аеродромите во Атланта, Њујорк, Вашингтон, Чикаго и Њуарк.
На овие аеродроми е поставена специјалната техника за преглед и проверка на патниците од регионот во Африка, каде е жариштето на заразата, од која досега починаа повеќе од 4500 луѓе.
На патниците им се мери телесната температура и се проверува дали имаат треска, што според вирусолозите е првиот знак за инфицираност со ебола.
Некои здравствени експерти не веруваат многу во ваквото тестирање, ниту дека тоа може да помогне во запирање на ширењето на болеста, но властите во САД се одлучија на вакво решение по бурната реакција во американската јавност откако три лица заболеа од ебола, а еден пациент почина во болницата во Далас.