Факултет во Северна Каролина суспендираше свој студент поради коментарите кои ги оставил на Facebook, а се однесувале на новите карти за идентификација на факултетот.
Факултетот вовел нови картици за идентификација кои се така направени што можат да послужат како кредитни картички на финансиската компанија Higher One.
На Марк Бехтол, 37-годишниот студент воопшто не му се допаднала идејата за вакви картици, па на Facebook се пожалил велејќи дека факултетот воопшто не смее да дели приватни податоци за студентите со некоја финансиска компанија.
Сето тоа го нарекол агресивен маркетинг бидејќи, како што сведочи, со новите картици почнал да добива и e-mail пораки во кои се нудат најразлични финансиски услуги.
„Ги продава ли нашиот факултет нашите имиња на банките? Мислам дека треба да го регистрираме факултетот на сите познати порно страници, па после и тие нека добиваат понуди. Знаете ли некој добар вирус за да им го пратам?“, напишал Бехтол на Facebook.
После ваквиот коментар, на 4-ти октомври го избркале од предавањата и му рекле дека е суспендиран на два месеца, а притоа не го ни сослушале што има да каже во своја самоодбрана. Исто така, добил писмо од факултетот во кое стои дека неговите пораки на Facebook биле вознемирувачки и оти укажуваат на можност за одредени криминални дејствија против факултетот.
Во одбрана на студентот застана Foundation for Individual Rights in Education, која наведува дека во случајот со Марк Бехтол се крши првиот амандман од американскиот закон, бидејќи факултетот со казна реагирал на нешто што било очигледна критика. Тие исто така бараат студентот веднаш да се врати на предавања.
После сè, Марк јавно се извинил за своите зборови, по што му е дозволено да се врати на предавањата. Сепак, не смее да користи ниту еден компјутер на факултетот додека не им се пријави на надредените.
Во меѓувреме, Марк Бехтол се пријавил на друг факултет и очекува дека ќе биде примен.
Ова не е прв случај финансиските компании да дојдат до податоците од картиците за идентификација на студентите. На Facebook дури постои и група која се буни против ваквиот маркетинг, а се нарекува „Ignore the Higher One debit card offer“.