Со завршување на финалето во Лигата на шампионите стивнаа возбудувањата во Европа. Љубителите на најважната споредна работа во светот сега може да се фокусираат на фудбалските терени во Јужна Америка. Од утре па до 4 јули Чиле ќе биде домаќин на репрезентациите од најфудбалскиот континент во светот. Се игра 44. издание на популарната Копа Америка. Победникот во следните четири години ќе го има приматот на најдобра селекција на овој континент.
СО БАРСА ОСВОИ СЕ, НА РЕД Е РАДОСТ СО „ГАУЧОСИТЕ“
Лионел Меси е прва ѕвезда на турнирот. Капитенот на Аргентина се очекува конечно да блесне во националната селекција и да донесе радост на фановите на „гаучосите“. Аргентина досега има 14 трофеи, односно само еден помалку од рекордот на Уругвај, кој е и актуелен бранител. Сепак, интерено е тоа што Аргентина повеќе од две децении нема трофеј на Копа Америка. Тие последен пат се радуваа во далечната 1993 година. Ако не се смета златниот медал на Олимписките игри во Пекинг од 2008 година, каде не играат најдобрите играчи, тогаш златото од 1993 година е и нивни последен голем трофеј од меѓународни натпреварувања.
ЛЕО НАЈАВИ ЗЛАТЕН МЕДАЛ
Минатата година имаа шанса да го прекинат овој долг пост, но Меси и другарите беа поразени во финалето на Светското првенство во Бразил. Сепак, со таа игра покажаа дека се способни за голем дострел. Меси сезонава блеска и речиси е незадржлив. Затоа најмногу благодарение на неговата игра, Барселона ја освои тројната круна. Аргентинецот сега најавува дека шампионскиот ритам ќе го задржи и во репрезентативниот дрес.
„Голема чест е да се носи националниот дрес, а уште повеќе да си капитен. Нашата главна цел за оваа година е да го освоиме златото на Копа Америка“, кратко и јасно најави Меси.
Тој има 45 гола во 97 настапи. Во Чиле ќе го прослави јубилејниот 100. настап за репрезентацијата.
Покрај Меси, во нападот на Аргентина се и Серхио Агуеро и Гонзало Игуаин. Секако дека воопшто нема да ѝ биде лесно на Аргентина во походот кон тронот. Бразил предводен од Нејмар ќе биде најголем ривал, а секако дека секогаш мора да се смета и на најтрофејниот Уругвај каде во нападот се Суарез и Кавани. Домаќинот Чиле има состав кој може да биде „изненадување од сенка“. На крајот тој што ќе биде најдобар на теренот ќе се радува на тронот.