Јувентус и Баерн одиграа фантастичен прв осминафинален натпревар во рамките на Лигата на шампионите кој заврши со резултат 2:2. Баерн доминираше во првите 55 минути, но потоа Јувентус се издигна и го израмни резултатот. Јувентус остана во игра иако во Минхен има обврска да победи.
Тренерот Пеп Гвардиола е задоволен од играта на својата екипа па и од резултатот кој е поволен пред реваншот на „Алијанц арената“.
„Тоа беше страшен меч меѓу две фантастични екипи. Прекрасно беше да се дојде во Торино и да се одигра на тој начин против Јувентус. Задоволен сум од играта на мојата екипа. Јувентус имаше три удари и даде два гола, но тоа е голема екипа па во Торино тешко дека некој може да издржи без да прими гол. Не ни мислевме дека можеме во Торино да доминираме и да победиме со 7:0. Знам дека луѓето зборуваат само за резултатот, а никој не зборува за играта. Баерн се покажа во одлично светло“, изјави Гвардиола.
Според него, немало замор кај неговите фудбалери во финишот на мечот.
„Ако имаше пад немаше да атакуваме во последните 15 минути. Зарем мислевте дека можеме да доминираме во сите 90 минути против екипа која ги има Погба, Манџукиќ, Мората, Буфон и Бонучи кој ми е еден од омилените играчи?“, вели Пеп.
„Точно е дека Јувентус има шанси да се пласира понатаму, а имаме и ние“, заврши шпанскиот стратег.