Скопје, 2 октомври 2016 (МИА) – Фудбалерите на Вардар ја прекинаа низата од два натпревари без победа во Првата македонска фудбалска лига. Во натпревар 9.коло одигран попладнево во Кратово, актуелниот шампион Вардар забележа победа против Силекс со 3:1.
Головите за Вардар ги постигнаа: Стефан Спировски (7-минута), Хуан Фелипе Алвес Рибеиро од пенал (42) и Дамир Којашевиќ (70), додека почесниот го, за Силекс беше дело на Андреј Ацевски (76)
На другите три средби одиграни попладнево: Ренова и Победа 1:1, Пелистер – Шкендија 1:2 и Македонија ЃП – Шкупи 0:1.
Вчера, Работнички и Брегалница одиграа без победник 1:1.
Табела: Вардар 21 бодови, Шкендија 17 (-1 натпревар помалку), Работнички 13, Пелистер 12, Ренова 12, Силекс 10, Шкупи 9, Победа 9, Брегалница 7 и Македонија ЃП 6.
Следното 10.коло ќе се игра на 16 октомври, поради настапот на двете македонски селекции во квалификациите. Сениорската на 6 и 9 октомври во Мундијалските квалификации ќе игра против Израел и Италија, а младата (до 21 година) на 11 октомври ја пречекува Шкотска во клучниот натпревар за пласман на Европското првенство.
Трите натпревари на македонските фудбалери ќе ги играат на арената „Филип Втори“ во Скопје.