Најтрофејните клубови во Шпанија и Германија, екипите на Реал Мадрид и Баерн Минхен, ја покажаа силата. Клубовите кои со години се меѓу најсилните во Европа одиграа фантастично во првите мечеви од осминафиналето во Лигата на шампионите. Реал со 3:1 го победи Наполи, додека Баерн беше уште поубедив и со 5:1 го „растури“ Арсенал. На реваншите во Неапол и Лондон ќе треба да одиграат рутинирано и да ја задржат стекнатата предност од првите 90 минути.
„АЛИЈАНЦ АРЕНА“ Е НЕОСВОИВА ТВРДИНА
Иако се очекуваше да биде неизвесно до самиот крај, Баерн Минхен го „прегази“ Арсенал. На германскиот првак му беа доволни само 45 минути за да ги реши сите дилеми. Откако по првото полувреме беше нерешено, Баерн даде четири погодоци во вториот дел и стигна до убедлива победа.
Германскиот првак е убедливо најдобриот домаќин во историјата на ЛШ. Против Арсенал стигна до 16 победа во низа и само ја зголемува рекордната серија. Тимот нема пораз на „Алијанц арена“ од април 2014 година, што само ја покажува страшната доминација на баварците.