Кристијано Роналдо и Петр Чех се избрани за најдобри играчи за 2016 година во Португалија и Чешка. Најдобриот фудбалер во светот очекувано доби уште едно признание за најдобар, овој пат во својата родна земја. Роналдо во 2016 година ја предводеше Португалија до првата европска титула на континенталниот собир во Франција, а со Реал Мадрид беше најдобар во Лигата на шампионите. Го крена трофејот и во Суперкупот на Европа, а стана и светски клупски првак со „кралевите“.
Во Чешка, рекордер е Петр Чех. Ова е негово рекордно девето вакво признание. Чех реши да стави крај на репрезентативната кариера по завршување на Европското првенство во Франција. Имаше вкупно 124 настапи за националниот тим. Сега Чех се фокусира само на настапите во својот клуб, Арсенал.