Вест Хем денес го назначи англискиот фудбалски стручњак Греам Потер за главен тренер на тимот, објавено е на клупската веб-страница на премиерлигашот од Лондон.
Четириесет и деветгодишниот Потер го замени Хулен Лопетеги на оваа позиција.
Вчера Шпанецот заедно со неговиот стручен штаб го напушти Вест Хем.
Договорот на Потер со „Чеканите“ е на две и пол години.
- Вест Хем Јунајтед со задоволство го пречекува Греам Потер како нов тренер на клубот. Високо почитуван и баран менаџер, Потер ја чека вистинската можност откако ја напушти својата последна функција во Челзи во април 2023 година. Тој беше едногласно избран од бордот да го одведе клубот напред во согласност со неговите цели и амбиции“, се вели во соопштението на клубот.
Потер остана без работа во април 2023 година, откако беше отпуштен како менаџер на Челзи. Претходно ги водеше Брајтон, Свонси и Остерсунд.