Во деновите кога и официјално Пандев и Лацио се во војна се случуваат најави и нови приказни околу иднината на фудбалерот кој пред неколку дена поднесе тужба против клубот и на зелена маса ќе ја бара слободата да си оди во поголем клуб. Пандев има аргументи, а Лацио собира докази дека фудбалерот имал контакти со други екипи иако се уште бил под договор со римјаните.
Од Англија вчера пристигна најава дека Ливерпул до Лацио понудиле 7.000.000 евра со цел Горан Пандев да се пресели на "Енфилд". Во моментов тоа е одлична сума која би ја заработил Лацио, кој се соочува со губење на процесот затоа што Пандев има многу аргументи со кои ќе докаже дека тој е во право.
"Ливерпул!? Фиорентина!?... Не ме прашувајте повеќе за понуди. Немам никакви информации, но немам ниту контрола врз Пандев иако тој е наш фудбалер. Ниту јас, а ниту Пандев може да го решат проблемот. Сега за тоа одлучуваат судовите. Ние ќе докажеме дека сме во право...", е изјавата на Клаудио Лотито, првиот човек на Лацио за медиумите во Италија.
Иако се шират многу верзии и многу приказни треба да се очекува Пандев зимава да заврши во Интер. Имаше и најави дека тој веќе има преддоговор со "нероаѕурите", но тоа се само шпекулации. Пандев во сите овие тешки недели не дава изјави околу проблемите со оглед на тоа дека секој негов збор може да има контраефект во судскиот процес.
Има најави дека на 20 или 25 октомври ќе се разгледува барањето на Пандев, а кон крајот на ноември треба да се очекува финалната разврска и да се знае дали Пандев ќе ја добие битката со клубот. И додека двете страни се спорат, клубот продолжува со слабите резултати и никако да победи во Серија А.