По извонредното издание против Ливерпул и победата од 2:0 Челзи застана на челната позиција на табелата со два бода повеќе од шампионот Манчестер Јунајтед, а шест од "Црвените" од Енфилд.
Минатата сезона Челзи освои само четири бода од можните 18 против конкурентите вклучувајќи го и Арсенал, но оваа момците на Карло Анчелоти добро "газат" во првенството и влегуваат како сериозни кандидати за шампиони на Англија.
Напаѓачот на екипата Дидие Дрогба е оптимист во пресрет на продолжението на сезоната изјавувајќи дека тимот многу научил од грешките кои ги правеше минатата сезона.
"Минатата сезона титулата ја изгубивме откако имавме лоши резултати против големите екипи. Ремизиравме со Јунајтед, а загубивме од Ливерпул и Арсенал, па оваа сезона се сконцентриравме да ја подобрите играта на тие мечеви. Тимот мора да победува против нив, за да биде на врвот. Мечот со Ливерпул беше прв натпревар против гигантите и беше исклучително важно да се извојува победа со која ќе покажеме дека оваа сезона не се шегуваме и одиме на шампионската круна. Им порачувам на другите екипи дека Челзи игра сосема поинаку од лани и ќе мора добро да се испотат за да дојдат до некој бод", изјави Дрогба.
Победата над Ливерпул за лондонската екипа беше одличен одговор на минатонеделниот пораз од Виган и минималната победа над АПОЕЛ од Лигата на шампионите.
"Виган беше разочарување бидејќи во борба за првото место ќе мора многу малку да се 'киксира' против екипи од нивен ранг. Се радувам што ја поправивме играта против Ливерпул. Тоа ни дава голема самодоверба во пресрет на останатите искушенија во кои мислам дека ќе ги издржиме. Оваа сезона е наша и ќе ја освоиме титулата", додаде репрезентативецот на Брегот Слонова Коска.
Следниот меч на Челзи е против Астон Вила во Бирмингем, а второто големо дерби на "Сините" е на 8. ноември кога на Стемфорд Бриџ ќе гостува Манчестер Јунајтед, а дотогаш Челзи ќе ги одмери силите уште со Блекбурн и Болтон.