Селекторот на фудбалската репрезентација на Аргентина, Диего Марадона, најави дека може да ја напушти клупата на националниот тим, дури и ако "Гаучосите" се квалификуваат на Светското првенство 2010 година. Марадона призна дека постојат неколку работи кои не му се допаднале откако е селектор и ќе размисли за својата иднина на оваа позиција. Како една од причините за заминувањето на аргентинската легенда се наведува несогласувањата со директорот на репрезентацијата Карлос Билардо.
"Беше одлично кога Хулио Грондони ме повика и ми понуди да бидам селектор на Аргентина. Со задоволство реков 'да' и им ги поставив моите барања пред да се зафатам со оваа одговорна работа. Се најдовме во многу лоша ситуација, но, сепак, нема да бегам од одговорноста, барем не до завршувањето на квалификацискиот циклус. Постојат неколку работи кои не ми се допаѓаат и за да останам на клупата на репрезентацијата ќе мора да седнеме и да поразговараме со челниците. Ќе им повторам дека мора да се ценат моите услови", изјави Марадона.
Селекторот беше изнервиран што Пабло Забалета пристигна во Аргентина повреден, а тој го обвини директорот Биларда за тоа. Имено, Марадона побара од Биларда да лобира кај челниците на Сити да не ги ставаат во игра Тевез и Забалета на мечот со Астон Вила за да бидат подготвени за најважните мечеви на Аргентина за пласман на Мундијалот, против Перу и Уругвај.
Двајцата настапија за Сити, а Марадона збесна кога дозна дека Забалета се повредил и нема да може да игра. И покрај проблемите, легендата на аргентинскиот фудбал изјави дека нема да повикува нов играч на неговото место.