Најскапиот фудбалер на светот Кристијано Роналдо во разговор за италијанскиот весник Кориере дело Спорт е прашан за тоа кој се трите најдобри светски фудбалери по негово мислење. Португалецот интересно го изоставил Лионел Меси, напаѓачот на Барселона кој ги однесе наградите од Франс фудбал и ФИФА за најдобар фудбалер на светот за 2009. година. Освен тоа Меси освои се што можеше да се освои минатата сезона со Барселона, а оваа сезона е втор најдобар стрелец во првенството со 16 постигнати погодоци.
"Кака, Руни и Дрогба се најдобрите светски играчи", изјавил Роналдо.
Бразилскиот интернационалец Кака сеуште е вистинска фудбалска ѕвезда иако не игра на посакуваното ниво откако премина во Примера, а Руни е лидер во Јунајтед и негов добар пријател од времето кога настапуваше за Манчестер. Изненадувачки е изборот на Дрогба за кого Роналдо смета дека е еден од најтешките фудбалер за чување.