Претседателката на Рома, Росела Сенси, беше бесна по победата на Интер над Лацио на Олимпико. Таа го гледаше дуелот кој беше од големо значење за нејзиниот тим, меѓутоа си замина огорчена од она што го виде. "Нероазурите" играа во Рим исто како да се наоѓаат на Џузепе Меаца поради тоа што навивачите на Лацио во текот целиот натпревар беа против својот клуб, односно против Рома, а навиваа за Интер да стигне до титулата во првенството. Во таков лош амбиент се вклопија и фудбалерите на Лацио, кои не прикажаа некоја поголема желба за надигрување. Дури и кога напаѓаа нивните фанови ги исвиркуваа, нешто што никогаш не се случило на фудбалските терени низ светот.
"По овој натпревар мислам дека е парадоксално да се смета Серија А за една од најдобрите првенства во светот. Да бев на чело на Интер ќе се срамев што победив на ваков натпревар. Со ова сакам да упатам силен протест до челниците на фудбалскиот сојуз иако ми е јасно дека нема да имам многу корист од тоа. Мечот заврши како што заврши, а нам ни преостанува да се сконцентрираме кон финалето од националниот куп", во бес изјави Сенси.
Рома ја совлада Парма во саботата и за момент се искачи на врвот, но Интер со триумфот во неделата повторно ја прескокна и сега има 76 бода, два повеќе од "волчицата". Тимот од Милано е на чекор до "Скудетото" бидејќи има лесни противници во последните две кола.