Двете најуспешни екипи оваа сезона во Серија А со денешниот натпревар од финалето на Купот ќе ја почнат распределбата на пехарите.
На „Олимпико“ Рома ќе има мала предност бидејќи финалето се игра на нивниот терен. Во редовите на Интер се очекува враќање во тимот на македонскиот репрезентативец Горан Пандев, кој ќе има шанса да го одбрани пехарот кој лани го освои со својот претходен тим Лацио. Според италијанските медиуми Пандев ја залечил повредата на ногата и се очекува тој да биде на клупата за резервни фудбалери на „нероазурите“.
Инаку, ова е петто финале за двата тима во последните шест години и двете екипи имаат по два триумфа во овој период. Вкупно Рома има освоено 9 купа (заедно со Јувентус најмногу), додека Интер има 5.