Фудбалерите на Интер со победата од 1:0 против Рома синоќа на „Олимпико“ во Рим го освоија трофејот во италијанскиот куп. Стрелец на единствениот гол во финалето беше Диего Милито во 40-тата минута по одлично изведениот контра напад и шут од 20-ина метри откосо.
Ова беше трет освоен Куп во последниве шест години, а вкупно шести во историјата на клубот. Поуспешни од „нероазурите“ се Јувентус и Рома со по 9 триумфи.
Македонскиот репрезентативец Горан Пандев кој од клупата за резервни играчи го проследи натпреварот, го одбрани трофејот во Купот освоен лани со поранешниот негов клуб Лацио.
За актуелниот италијански првак до крајот на сезоната му остануваат уште две можности да дојде до нова титула. Едната е во Серија А во која на две кола пред крајот има два бода предност пред Рома, а другата шанса е Лигата на шампионите, на 22 овој месец Интер во финалето ќе игра со Баерн.