На „Нордбанк Арена“ во Хамбург вечерва од 20 часот и 45 минути ќе се одигра финалето во фудбалската Лига на Европа. Атлетико Мадрид и Фулам ќе се обидат да го направат завршниот чекор во второто по квалитет натпреварување во Европа.
Мала предност за триумф во финалето му се дава на шпанскиот тим, но не треба да се заборави на серијата на Фулам кој беше поуспешен од екипи како Шахтјор, Јувентус, Хамбургер. Англичаните својата шанса ја гледаат во успешно одиграната сезона во Премиер лигата и добриот резултат против Хамбургер во полуфиналето токму на стадионот на кој ќе се игра завршниот меч.
И Атлетико Мадрид исто како и Фулам беше вкупен победник во натпреварите со силни екипи. Шпанците на патот до финалето ги елиминираа Спортинг, Валенсија и Ливерпул и се надеваат дека лошата сезона од националното првенство може да ја спасат со освојување на пехарот во Лигата на Европа.
Главен судија на вечерашниот натпревар ќе биде Италијанецот Никола Рицоли.