Рафаел Бенитез, доскорешниот тренер на премиерлигашот Ливерпул, во следните три сезони ќе седи на клупата на европскиот шампион Интер. Шпанскиот фудбалски стручњак според италијанските медиуми за преселбата во Милано ќе добие 9 милиони евра за тригодишниот договор со можност тој да биде продолжен за уште една година.
Претседателот на Интер Масимо Морати во Бенитез го гледа единствениот наследник на Жозе Мурињо кој може да ги повтори успесите на „нероазурите“ остварени во оваа сезона.
- Доаѓањето на Бенитез ни гарантира континуитет во работата на исто ниво како и досега. За кусо време Шпанецот и официјално ќе биде претставен на јавноста како нов шеф на стручниот штаб на клубот. Управата ќе му овозможи неколку засилувања, но за тоа ќе почекаме откако ќе се соберат играчите на првиот тренинг и откако новиот тренер ќе ги искаже своите планови за новата сезона. Со конкретни имиња во моментов не сакам да шпекулирам, изјави за италијанските медиуми Морати.
Се очекува Бенитез во текот на денот да го превземе кормилото на клубот во кој настапува најдобриот македонски фудбалер Горан Пандев.