Легендата на Реал Мадрид, Раул Гонзалес веќе е фудбалер на Шалке, тврди германскиот таблоид Билд во своето вчерашно издание. Според истиот извор, трансферот, за кој многу се зборуваше последните денови, останува уште 33-годишниот напаѓач да биде претставен на навивачите на Шалке, а за двегодишниот договор со тимот од Гелзенкирхен ќе заработи 12 милиони евра.
Според Билд, дозвола за преминот на Раул дал и Реал Мадрид и покрај што фудбалерот има договор на уште една сезона.
"Многу е веројатно Раул да биде претставен до крајот на оваа недела", изјави тренерот на Шалке, Феликс Магат.
Официјална потврда од германскиот бундеслигаш се уште нема затоа што пред преселбата Раул треба да се договори со своите лични спонзори. Според Билд, многу важна улога за трансферот на поранешниот шпански репрезентативец имал Криштоф Мецелдер кој летово исто така од Реал се пресели во Шалке.
"Се избезумив кога Раул ми кажа дека е заинтересиран да дојде овде. Ме прашуваше кој град е најубав и каде неговите деца ќе можат да одат на училиште", рече Мецелдер кој при преговорите бил преведувач.
Пред два дена англиските медиуми тврдеа дека во трката за Раул се вклучил и Тотенхем, но од тоа најверојатно нема да има ништо.