Репрезентацијата на Македонија ќе игра на гости со Малта во последниот тест натпревар пред почетокот на квалификациите за Европското првенство кое 2012 година ќе се одржи во Полска и во Украина. Почетокот на натпреварот во Ла Валета е закажан за вечерва од 20 часот.
Во македонската експедиција на Малта владее оптимизам и уверување дека ќе продолжи серијата од пет победи против Малта, а и добрите резултати од пријателските натпревари каде беа остварени победи против Азербејџан и Романија.
- После два месеца репрезентацијата повторно се собира и атмосферата е одлична. Ова се подготовки за Словачка и очекувам сигурна победа против Малта за да ја продолжиме победничката серија и да ја зајакнеме самодовербата со што подготвени ќе влеземе во стартот на квалификациите за ЕП 2012. мислам дека самиот старт е најважен и доколку со Словачка и Ерменија оствариме позитивни резултати, можеме да ги оствариме нашите соништа, изјави Един Нурединовски македонскиот интернационалец кој брани во Етникос Ахна од Кипар.
Македонската фудбалска репрезентација новиот квалификациски циклус ќе го започне на 3 септември во Братислава против Словачка.