Турскиот фудбалски гигант Галатасарај вчера официјално го именува Георге Хаџи за нов тренер на првата екипа како наследник на Франк Рајкард кој во средата доби отказ од истата функција. Романецот ја доби довербата на клупското раководство во конкуренција на Фатих Терим чие име исто така се спомнуваше како можен тренер на Галатасарај. Всушност, Терим ја одби понудата, но не и Хаџи кому ова ќе му биде втор мандат на тренерската клупа во клубот од Истанбул откако во 2005 година го освои Купот на Турција со победата од 5:1 во финалето против Фенербахче.
"Георге Хаџи е именуван за нов тренер на Галатасарај, а негов асистент ќе биде Тугај Керимоглу", објави турскиот гигант во своето официјално соопштение. Освен како тренер, Хаџи се прослави и како фудбалер во дресот на Галатасарај каде настапуваше од 1996 до 2001 година и освои по еден трофеј во Купот на УЕФА, Супер-купот на Европа, четири во турското првенство и по два во Купот и Супер-купот на Турција.
Со четири победи и четири порази во првите осум кола од првенството, Галатасарај се наоѓа на деветтата позиција на табелата, а своето деби Хаџи ќе го има во дербито против Фенербахче в недела на Шукру Сарачоглу. Интересно е тоа што на турската берза вчера акциите на Галатасарај забележаа пад на својата вредност од 1,4% откако излезе веста за ангажманот на Хаџи. Галатасарај треба наскоро да се пресели на својот нов стадион Турк Телеком арена со капацитет од 53 илјади места и со тоа да стави крај на ерата на Али Сами Јен.