Откако во Португалија, Англија и Италија собра респектибилен број на црвени картони, стратегот на Реал Мадрид, Жозе Мурињо, го дочека првото исклучување во Шпанија. Во реванш натпреварот од шеснаесетфиналето од Кралскиот куп неговите фудбалери победија со 5:1, а Португалецот при резултат од 1:0 успеа да го налути судијата Хозе Луис Парадес Ромеро и притоа заработи црвен картон. Португалецот без протест ја прифати одлуката и се качи на трибината на Сантијаго Бернабе. Камерите и новинарите не пропуштија да го одбележат овој момент, а навивачите на Реал добија ретка можност да бидат во негова близина.
Меѓутоа, шоуто на "Му" продолжи на конференцијата за новинари. Тој подготви статистички податоци за главниот арбитар, а посочи дека целиот инцидент предвреме го испланирал.
"Ако го погледнете неговиот профил и статистика, самите ќе оцените дали е добар или лош судија. Зад себе има помалку од 50 натпревари искуство, а веќе доделил 250 жолти картони и 14 или 15 црвени. Тоа е просек од шест картони по натпревар. Само на дуелот меѓу Сарагоса и Мајорка покажа рекордни десет жолти и два црвени, што е премногу", им објасни Мурињо на новинарите.
Судијата на овој натпревар откри дека го исклучил португалскиот тренер поради навредливи зборови. Прво му доделил жолт картон поради преминување на полето наменето за тренерите, а потоа упатил погрдни зборови со што Ромеро морал да го санкционира.
Сега се е во рацете на дисциплинската комисија на Шпанската фудбалска федерација, а доколку го прогласи за виновен ќе добие суспензија на два натпревари.
Додека работеше во Португалија "Специјалниот" беше "омилен" кај Педро Проенка. Овој португалски арбитар го исклучуваше дури трипати.
Додека го предводеше Челзи заработи два меча суспензија во Лигата на шампионите поради навредување на судија, а во Интер заработи четири црвени картони на дуелите со Сампдорија, Фиорентина, Каљари и Јувентус.