Бразилскиот фудбалски стручњак Леонардо ќе го замени Рафаел Бенитез на клупата на Интер, пренесуваат светските спортски медиуми.
Неколкудневните шпекулации околу наводниот отказ на Бенитез, сопственикот на Интер Масимо Морати ги разрешил синоќа пред полноќ кога одлучил на клупата на европскиот и италијански шампион да го донесе Леонардо, поранешниот тренер на градскиот ривал и лут противник, тимот на Милан.
Трпението на Морати за слабите резултати на Интер во Серија А ескалирало по завршувањето на Светското клупско првенство, кога Бенитез побара од раководството најмалку три засилувања во зимскиот преоден рок или во спротивно најави заминување од клубот.
Засега нема официјална потврда за смената на кормилото на Интер, а денеска не функционира и интернет сајтот на клубот.
Бранителот на титулата во Италијанското фудбалско првенство моментно е на седмата позиција со вкупно освоени 23 бодови или 13 помалку од лидерот Милан, но Интер треба да одигра два одложени дуела, па со евентуални две победи разликата може да ја намали на седум бода.